ఆటలోని క్షణాలన్నీ.. అద్భుతంగా సాగుతాయి. గెలుపు కోసం ఆటగాళ్ల ప్రయత్నాలు; విజయోత్సాహాలు; ఓటములు; నిరాశ నిస్పృహలు.. అన్నీ ఆ ఒక్క క్షణమే మెరిసి మాయమవుతాయి. లిప్తపాటులో మారిపోయే భావోద్వేగాలు.. తమదైన కథను చెబుతాయి. ఆటగాళ్లతోపాటు అభిమానుల గుండెల్లో చిరస్మరణీయంగా మిగిలిపోతాయి. కానీ, కెమెరాలో బంధించిన ఫొటోలు.. ఆ అపురూప క్షణాలను చిరస్థాయిగా నిలుపుతాయి.
డీఎస్ఎల్ఆర్ ఎందుకు?
వేగవంతమైన షట్టర్ స్పీడ్ ఉంటుంది. కాబట్టి, ఆటలో క్షణాల్లో జరిగిపోయే సంఘటనలను కూడా స్పష్టంగా ఫ్రీజ్ చేయవచ్చు.
కంటిన్యుయస్/ బరస్ట్ షూటింగ్ ద్వారా ప్రతి క్షణాన్నీ క్యాప్చర్ చేయవచ్చు.
* RAW ఫార్మాట్ సపోర్ట్ ఉండటం వల్ల.. పోస్ట్ ప్రాసెసింగ్లో కలర్, షార్ప్నెస్, ఎక్స్పోజర్ను మార్చుకోవచ్చు.
టెలీఫొటో, జూమ్ లెన్స్లను వాడి, దూరంలోని ఆటగాళ్లను క్లియర్గా పట్టుకోవచ్చు.
మాన్యువల్ కంట్రోల్తో కెమెరాపై మీకు పూర్తి స్వేచ్ఛ ఉంటుంది. ఎప్పుడు, ఎలా షూట్ చేయాలో మీరే నిర్ణయించుకోవచ్చు.
అవసరమైన పరికరాలుకెమెరా
ఏదైనా డీఎస్ఎల్ఆర్. ఫ్రేమ్స్ రేట్ (ఫ్రేమ్స్ ఫర్ సెకండ్) ఎక్కువగా ఉండేవి ఎంపిక చేసుకోవాలి. కనీసం 8 ఎఫ్పీఎస్ లేదా అంతకంటే ఎక్కువగా ఉంటే మంచిది.
లెన్స్
70-200 ఎంఎం ఎఫ్/2.8.. ఇండోర్ గేమ్స్ను కవర్ చేయడానికి..
300- 400ఎంఎం టెలీఫొటో లెన్స్.. మైదానంలో, దూరంలో ఉన్న ఆటగాళ్లను క్యాప్చర్ చేయొచ్చు.
24-70 ఎంఎం ఎఫ్/2.8 లెన్స్.. క్లోజ్అప్ షాట్స్, టీమ్ సెలెబ్రేషన్స్ను కవర్ చేయడానికి.
ఇతర పరికరాలు
మోనోపాడ్: స్టెబిలైజేషన్ కోసం
హైస్పీడ్ మెమొరీ కార్డ్ (యూహెచ్ఎస్ -II)
ఎక్స్ట్రా బ్యాటరీలు, లెన్స్ హుడ్
ఔట్డోర్ గేమ్స్లోకవర్ చేసేటప్పుడు వెదర్ ప్రొటెక్షన్ కవర్ ఉండాలి.
కెమెరా సెట్టింగులు
మోడ్: స్పోర్ట్స్ ఫొటోగ్రఫీలో షట్టర్ స్పీడ్పై నియంత్రణ అవసరం. అందుకే, మాన్యువల్ (M) లేదా షట్టర్ ప్రియారిటీ (S / Tv) వాడాలి.
షట్టర్ స్పీడ్
ఆటగాళ్లను క్లియర్గా క్యాప్చర్ చేయాలంటే షట్టర్ స్పీడ్ ఎక్కువ ఉండాలి. తక్కువైతే ఫొటోలు బ్లర్గా వస్తాయి. ఒక్కో రకమైన ఆటకు ఒక్కో విధంగా షట్టర్ స్పీడ్ను సెట్ చేసుకోవాలి.
రన్నింగ్.. 1/1000 sec
క్రికెట్, టెన్నిస్ లాంటి ఫాస్ట్ బాల్ గేమ్స్ అయితే.. 1/2000 – 1/4000 sec
జిమ్నాస్టిక్స్ మూమెంట్స్ కోసం.. 1/500 sec
క్రియేటివ్ మోషన్ బ్లర్ కావాలంటే.. 1/60 sec
అపర్చర్
ఇండోర్ గేమ్స్ కోసం.. తక్కువ లైట్ ఉంటుంది కాబట్టి, ఎఫ్/2.8 అవసరం
గ్రూప్ షాట్స్ కోసం.. ఎఫ్/8
ఫోకస్ మొత్తం ఒక్క ఆటగాడిపైనే ఉంచాలంటే.. ఎఫ్/2.8 ఉండాలి. అప్పుడు బ్యాక్గ్రౌండ్ బ్లర్ అయిపోయి, ప్లేయర్ మాత్రమే హైలైట్ అవుతాడు.
ఐఎస్వో
ఐఎస్వో పెంచితే.. ఫొటోల్లో నాయిస్ కూడా పెరుగుతుంది. అందుకే, RAW లో షూట్ చేస్తే.. తరువాత నాయిస్ను సరి చేయవచ్చు.
ఉదయం/ పగటి వేళల్లో, ఔట్డోర్ గేమ్స్ జరుగుతుంటే.. ఐఎస్వో 200-400
ఇండోర్ గేమ్స్, రాత్రిపూట ఫ్లడ్ లైట్ల వెలుతురు ఉన్నట్లయితే.. ఐఎస్వో 800-3200 ఉండాలి.
ఫోకస్ మోడ్
కంటిన్యూయస్ ఏఎఫ్ (ఏఐ-సర్వో/ ఏఫ్-సి): కదులుతున్న ఆటగాళ్లపైనే ఫోకస్ నిరంతరంగా పడుతూ ఉంటుంది.
ఫోకస్ ఏరియా మోడ్: డైనమిక్/ గ్రూప్ ఏరియా (వేగవంతమైన ఆటల్లో), సింగిల్ పాయింట్ (ప్రత్యేకమైన ఫొటోల కోసం)
డ్రైవ్ మోడ్
హైస్పీడ్ కంటిన్యూయస్ మోడ్లో ఉంచాలి. సెకండ్కు 8-12 ఫొటోలు వరుసగా వస్తాయి. వాటిలో బాగున్న వాటిని ఎంపిక చేసుకోవచ్చు.
కంపోజిషన్-ఫ్రేమింగ్
ఎమోషన్ క్యాప్చర్: ఆటగాడి కళ్లలో ఉత్సాహం, గెలవాలన్న సంకల్పం, గెలిచిన క్షణంలో ఆటగాడి భావోద్వేగాన్ని క్యాప్చర్ చేయండి.
స్టోరీ టెల్లింగ్: గెలిచిన క్షణంలో ఆటగాళ్ల సంబురాలు, బ్యాక్గ్రౌండ్లోని ప్రేక్షకుల ఆనందాలను కెమెరాలో బంధించి.. ఆ క్షణాలకు సంబంధించిన కథను ఫొటోల్లో నిక్షిప్తం చేయండి.
వీటితోపాటు రూల్ఆఫ్ థర్డ్స్, లీడింగ్ లైన్స్ లాంటి కంపోజిషన్ సూత్రాలను పాటిస్తూ.. ఫొటోలను మరింత అందంగా మలచండి.
ప్రాక్టికల్ టిప్స్
ఆట మొదలుకావడానికి ముందే.. ఆట స్థలాన్ని పరిశీలించండి. ఫ్లడ్ లైట్లు పడే దిశ, బ్యాక్గ్రౌండ్, మంచి వ్యూ దొరికే స్థలాల గురించి తెలుసుకోండి.
ఆటగాళ్ల కదలికలు, గేమ్ ఫ్లోను అర్థం చేసుకోండి.
యాక్షన్ జరిగే ప్రాంతాన్ని ముందే అంచనా వేసి (వికెట్లు, గోల్ పోస్ట్ దగ్గర).. అక్కడ ఫోకస్ చేయండి.
ఆటగాళ్ల వేగాన్ని అర్థం చేసుకుంటూ.. షట్టర్ స్పీడ్ను సమన్వయం చేసుకోండి.
ఒకే ఫొటోలో ఆట ఉద్దేశం, గెలుపు కోసం ఆటగాళ్లు పడే తపన, గెలిచిన తర్వాత వారి ఉత్సాహాన్ని మీరు ఫొటోలుగా మలిస్తే.. అదే నిజమైన స్పోర్ట్స్ యాక్షన్ ఫొటోగ్రఫీ. మైదానంలో ఆటగాళ్లతోపాటే మీరు కూడా కెమెరాతో ప్రాక్టీస్ మొదలుపెట్టండి. రకరకాల షట్టర్ స్పీడ్స్ మార్చుకుంటూ.. ప్రయోగాలు చేయండి. ప్రతి గేమ్ తర్వాత ఫొటోలను ఒక్కసారి రివ్యూ చేయండి. ఏవైనా తప్పులుంటే గుర్తించండి. అవి పునరావృతం కాకుండా జాగ్రత్త పడండి.
చివరగా, స్పోర్ట్స్ ఫొటోగ్రఫీ అంటే.. వేగం, దృష్టి, సమయాల కలయిక. మీ డీఎస్ఎల్ఆర్ కెమెరా ద్వారా ఆటలోని ప్రతి క్షణాన్ని కళాత్మకంగా ఫ్రీజ్ చేయండి. ఆ అరుదైన క్షణాలను కలకాలం నిలిపి ఉంచండి. ఒక్క ఫొటో.. వేల భావోద్వేగాలు! ఇదే స్పోర్ట్స్ ఫొటోగ్రఫీ!
– ఆడెపు హరికృష్ణ