KVS Admissions 2026-27: కేంద్రీయ విద్యాలయాల్లో అడ్మిషన్ల సందడి.. 2026-27 విద్యా సంవత్సర ప్రవేశాల నోటిఫికేషన్ విడుదల

KVS Admissions 2026-27: దేశవ్యాప్తంగా ఉన్న కేంద్రీయ విద్యాలయాల్లో (KVs) 2026-27 విద్యా సంవత్సరానికి సంబంధించి అడ్మిషన్ల ప్రక్రియను కేంద్రీయ విద్యాలయ సంఘటన్ (KVS) అధికారికంగా ప్రకటించింది. కేంద్ర ప్రభుత్వ ఆధ్వర్యంలో నడిచే ఈ పాఠశాలలు నాణ్యమైన విద్య, సీబీఎస్‌ఈ సిలబస్, క్రమశిక్షణకు ప్రసిద్ధి చెందినవి. దీంతో ప్రతి సంవత్సరం లాగానే ఈసారి కూడా సీట్ల కోసం భారీ పోటీ ఉండనుంది. ఈ నోటిఫికేషన్ ప్రకారం బాలవాటిక నుంచి 9వ తరగతి వరకు ప్రవేశాలకు దరఖాస్తులు ఆహ్వానించారు. ఇందులో భాగంగా ఒకటో తరగతి (Class 1), బాలవాటిక అడ్మిషన్లకు మార్చి 20 ఉదయం 10 గంటల నుంచి ఆన్‌లైన్ రిజిస్ట్రేషన్లు ప్రారంభమయ్యాయి. వీటిని ఏప్రిల్ 2 వరకు దరఖాస్తులు స్వీకరిస్తారు. ఇక 2వ తరగతి నుంచి 9వ తరగతి వరకు, బాలవాటిక-2 ప్రవేశాలకు ఏప్రిల్ 2 నుంచి ఏప్రిల్ 8 వరకు ఆఫ్‌లైన్ రిజిస్ట్రేషన్ నిర్వహించనున్నారు.
Vehicle Tax Cancelled: వాహనదారులకు శుభవార్త చెప్పిన తెలంగాణ ప్రభుత్వం.. 2 శాతం ట్యాక్స్ రద్దు..
మెరిట్ జాబితాల విడుదలకు కూడా తేదీలు ఖరారు చేశారు. బాలవాటిక మొదటి జాబితా ఏప్రిల్ 8న, ఒకటో తరగతి మొదటి జాబితా ఏప్రిల్ 9న విడుదల కానుంది. అవసరాన్ని బట్టి ఏప్రిల్ 16, 21 తేదీల్లో రెండో, మూడో జాబితాలు ప్రకటిస్తారు. మొత్తం అడ్మిషన్ ప్రక్రియ జూలై 31, 2026తో ముగుస్తుంది. విద్యార్థుల వయోపరిమితి కూడా స్పష్టంగా నిర్దేశించారు. మార్చి 31, 2026 నాటికి బాలవాటిక-1కి 3 నుంచి 4 సంవత్సరాల మధ్య, బాలవాటిక-2కి 4 నుంచి 5 సంవత్సరాల మధ్య, బాలవాటిక-3కి 5 నుంచి 6 సంవత్సరాల మధ్య వయస్సు ఉండాలి. ఒకటో తరగతికి కనీసం 6 సంవత్సరాలు పూర్తి అయి ఉండాలి. ఏప్రిల్ 1న జన్మించిన పిల్లలను కూడా అర్హులుగా పరిగణిస్తారు. దివ్యాంగులకు నిబంధనల ప్రకారం వయోసడలింపు ఉంటుంది.
రిజర్వేషన్ విధానం ప్రకారం ఎస్సీకి 15%, ఎస్టీకి 7.5 %, ఓబీసీ (NCL)కు 27%, దివ్యాంగులకు 3% సీట్లు కేటాయిస్తారు. కేంద్ర ప్రభుత్వ ఉద్యోగుల పిల్లలకు మొదటి ప్రాధాన్యత ఇవ్వబడుతుంది. ఆ తర్వాత రాష్ట్ర ప్రభుత్వ ఉద్యోగులు, ఎక్స్ సర్వీస్‌మెన్ పిల్లలకు అవకాశం ఉంటుంది. ఒకటో తరగతి, బాలవాటిక అడ్మిషన్లకు కేవలం ఆన్‌లైన్ ద్వారానే దరఖాస్తు చేయాలి. పై తరగతులకు సంబంధించి ఆయా కేంద్రీయ విద్యాలయాల్లో ఖాళీల ఆధారంగా నేరుగా స్కూల్‌కు వెళ్లి ఆఫ్‌లైన్ ద్వారా అప్లై చేయాలి. 11వ తరగతి అడ్మిషన్లు పదో తరగతి ఫలితాల తర్వాత ప్రారంభమవుతాయి.
Weight Loss Injections Prices Fall: ఇక చాలా తక్కువ ఖర్చుతో బరువు తగ్గొచ్చు.. 70 శాతం చౌకగా బరువు తగ్గించే ఇంజెక్షన్లు.. కానీ..!
దరఖాస్తు చేసేటప్పుడు విద్యార్థి జనన ధృవీకరణ పత్రం, నివాస ధృవీకరణ, కుల ధృవీకరణ (వర్తించే వారికి), ప్రభుత్వ ఉద్యోగుల సర్వీస్ సర్టిఫికేట్, పాస్‌పోర్ట్ సైజు ఫోటోలు వంటివి అవసరం. తల్లిదండ్రులు దరఖాస్తులో ఎలాంటి తప్పులు లేకుండా జాగ్రత్త వహించాలని, డాక్యుమెంట్ వెరిఫికేషన్ కఠినంగా ఉంటుందని అధికారులు సూచించారు. మరిన్ని వివరాలకు https://admission.kvs.gov.in/ ను వీక్షించండి.