Actor Sivakarthikeyan | తమిళ స్టార్ హీరో శివ కార్తికేయన్ ప్రయాణిస్తున్న కారు ప్రమాదానికి గురైంది. ఈ ఘటన చెన్నై నగరంలోని మధ్య కైలాశ్ ప్రాంతంలో చోటుచేసుకుంది. భారీ ట్రాఫిక్ కారణంగానే ఈ ప్రమాదం జరిగినట్లు ప్రాథమికంగా తెలుస్తోంది. ఒక్కసారిగా జరిగిన ఈ యాక్సిడెంట్తో అక్కడ కాసేపు ఉద్రిక్త పరిస్థితి నెలకొంది.సమాచారం అందుకున్న వెంటనే ట్రాఫిక్ పోలీసులు ఘటనా స్థలానికి చేరుకుని పరిస్థితిని అదుపులోకి తీసుకువచ్చారు. కొద్దిసేపట్లోనే ట్రాఫిక్ను క్లియర్ చేసి రాకపోకలను సజావుగా కొనసాగించారు. ఈ ప్రమాదంలో ఎవరికి ఎలాంటి గాయాలు కాకపోవడంతో అందరూ ఊపిరి పీల్చుకున్నారు. అయితే శివ కార్తికేయన్ కారు స్వల్పంగా దెబ్బతిన్నట్లు సమాచారం.
ప్రమాదం జరిగిన అనంతరం రెండు కార్ల డ్రైవర్ల మధ్య వాగ్వాదం చోటుచేసుకుంది. ఆ సమయంలో శివ కార్తికేయన్ కూడా అక్కడే ఉండి పరిస్థితిని గమనించారు. ఈ ఘటనను అక్కడే ఉన్న కొంతమంది వాహనదారులు తమ మొబైల్ ఫోన్లలో రికార్డ్ చేయగా, ఆ వీడియోలు ప్రస్తుతం సోషల్ మీడియాలో వైరల్ అవుతున్నాయి.
ఇదిలా ఉండగా, ‘రెమో’ సినిమాతో తెలుగు ప్రేక్షకులకు కూడా దగ్గరైన శివ కార్తికేయన్ ప్రస్తుతం కీలక సినిమాలతో బిజీగా ఉన్నారు. సుధా కొంగర దర్శకత్వంలో తెరకెక్కుతున్న ‘పరాశక్తి’ సినిమాతో సంక్రాంతి బరిలోకి దిగుతున్నారు. ఈ సినిమాలో హీరోయిన్గా శ్రీలీల నటిస్తోంది. తాజాగా ఈ ప్రమాద వార్త బయటకు రావడంతో అభిమానులు ఆందోళన చెందినా, ఎలాంటి ప్రమాదం జరగకపోవడంతో ఊరట చెందుతున్నారు.
కాగా శివ కార్తికేయన్ రెమో, వరుణ్ డాక్టర్, కాలేజ్ డాన్, అమరన్, ప్రిన్స్, సినిమాలతో తెలుగు ప్రేక్షకులను అలరించారు. గతేడాది అమరన్ చిత్రంతో బ్లాక్ బస్టర్ హిట్ అందుకున్నాడు. అశోకచక్ర బిరుదు గ్రహీత మేజర్ ముకుంద్ వరదరాజన్ జీవిత చరిత్రతో తెరకెక్కిన ఈ చిత్రంలో దేశభక్తిని, త్యాగాన్ని, ధైర్యాన్ని దేశవ్యాప్తంగా ప్రేక్షకులకు చూపించారు. ఇందులో ముకుంద్ వరదరాజన్ పాత్రలో శివకార్తికేయన్ అద్భుతంగా నటించి అలరించాడు. ఈ మూవీలో సాయి పల్లవి ఆర్మీ ఆఫీసర్ భార్యగా నటించింది. శివకార్తికేయన్ హీరోగా తెరకెక్కుతున్న పరాశక్తి. 2026 జనవరి 14న విడుదలకు సిద్ధమవుతోంది.
Actor #Sivakarthikeyan‘s car met with a small accident near Madhya Kailash in Chennai due to heavy traffic, but no one was injured.
pic.twitter.com/KV76sViPhi
— Suresh PRO (@SureshPRO_) December 20, 2025